A la Vergini Addulurata, prutittrici di lu mari

A LA VIRGINI ADDULURATA PRUTITTRICI DI LU MARI

O Madunnuzza bedda di lu mari,
gioia e surrisu d’ogni piscaturi,
scanzalu di timpesti e li marusi,
dunaci luna ianca e notti chiara.

Matri adurata, luci di l’occhi, miraculu d’amuri,
s’arraccumanna a Tia lu marinaru,
a li To pedi prega ccu firvuri.
Surgenti d’acqua viva, d’acqua pura,
duci spiranza d’ogni criatura,
Virgini Addulurata Matri Santa,
portu sicuru di cu la vita arrisica ogni jornu
‘mmenzu lu mari apertu e lu straventu.

Raggiu di luna, suli risplinnenti,
di stiddi rilucenti ‘ncurunata,
rifuggiu di lu miseru,
cunzòlu di lu cori.

Riggina Unniputenti di tuttu lu Criatu,
stenni ‘nto mari lu To mantu Santu,
duna spiranza a cu a Tia cunfida,
duna curaggiu a cu l’unna cavarca.

Ccu Tia a latu, passu passu
rischiaratu è lu tramuntu,
leggia leggia la fatica,
sonna casa, matri, figghi e di l’arma lu ristoru,
chiù sicuru lu camminu ‘nta lu mari tradituri.

ALLA VERGINE ADDOLORATA PROTETTRICE DEL MARE
O Bella Madonnina del mare, gioia e sorriso di ogni pescatore, liberalo dalle tempeste e dai marosi, donagli luna bianca e notte chiara. Madre adorata, luce degli occhi, miracolo d’amore, il marinaio si raccomanda a te, ai Tuoi piedi prega con fervore. Sorgente d’acqua viva, d’acqua pura, dolce speranza di ogni creatura, Vergine Addolorata Madre Santa, porto sicuro per chi rischia la vita ogni giorno in mare aperto, sfidando i venti. Raggio di luna, sole risplendente, incoronata di stelle, rifugio del misero, conforto del cuore. Regina Onnipotente di tutto il Creato, stendi il Tuo manto Santo nel mare, dona speranza a chi confida in te, dona coraggio a chi cavalca le onde. Con Te accanto il tramonto sarà più chiaro, la fatica più leggera, sogna casa, madre, figli e la pace nel cuore, il suo cammino sarà più sicuro nel mare traditore.

Margherita Neri Novi